CEBU, Philippines - Dul-an 30 ka mga mahalong gasang o coral nailog kagahapon sa mga otoridad sa gobyerno gikan sa kamot sa mga mananagat nga misuway unta pagkuha niini sa kadagatan sa Pungaton Reef sa barangay Tangke syudad sa Talisay.
Ang mga sakop sa Fishermen Sea and Ecological Care (FISECA) maoy nakakita sa upat ka mga mananagat nga nanguha sa maong mga gasang gikan sa nahisgutang lugar.
Nasayran nga ang sakop ni Alfredo Palas maoy nasakpan sa sakop sa FISECA nga nanguha sa maong mga gasang kay wala sila makakuha og isda sa ilang pagpanagat.
Matud pa ni Greg Dela Torre, ang chairman sa FISECA nga ang gikuha sa grupo ni Palas mga gitawag nga massive coral nga molanat pa og 20 ka tuig una kini modagko ilawom sa dagat.
Gitun-an karun sa FISECA ang pagsang-at og kaso batok sa mga malapason. (BANAT NEWS)