CEBU, Philippines - Pormal na nga gitunol kagahapon ang kontrobersyal nga bulawang pulseras ngadto sa tinuoray nga mga nanag-iya niini.
Gipanguluhan ni City Legal Officer Atty. Joseph Bernaldez ang pag-turnover sa bulawan nga bracelet ngadto sa managsuong Victor Chua ug Sabino Chua nga mga anak sa usa ka tag-iya og hardware sa siyudad sa Sugbo .
Ang duha nakapakita sa ilang mga dokumento nga nagpamatuod nga ang ilang mga ginikanan maoy tag-iya sa kontrobersyal nga bracelet.
Kahinumduman nga ang maong bracelet giprenda sa usa ka babaye niadtong unang bahin sa miaging buwan diha sa usa ka pawnshop sa barangay Pasil.
Apan gumikan sa kadako sa pagtanto sa balor niini nga miabot sa P100 mil nagduda na ang pawnshop tungod sa estado sa nagprenda niini hinungdan nga mipahibalo sila sa kapolisan.
Ang kapolisan nga kasamtangang nag-follow up sa laing kaso sa pagpangawat nga naglambigit sa mga alahas sa barangay Pardo daling misusi sa maong pawnshop sa pagtuong posibleng may koneksyon kini sa ilang giimbestigar nga kaso.
Apan nasutang dili kini konektado apan gikostudiya nila kini human napakyas ang miprenda sa pagpakita og dokumento nga ilaha ang maong alahas ug nasuta base sa ilang pamahayag nga kini ilahang nakit-an kauban sa mga karaang sinina nga gihatag sa usa ka negosyante og hardware.
Sumala pa ni Bernaldez nga lig-on ang gipakitang dokumento sa banay nga Chua dihang sila nakapakita sa mga resibo ug uban pa nga mga papeles nga nagpamatuod nga sila maoy nanag-iya niini.
Niadtong bulan sa Abril human mapatik dinhi sa Banat News ang maong alahas miabot sa upat ka mga tawo ang miadto sa buhatan sa Theft and Robbery Section (TRS) sa Cebu City Police Office (CCPO) nga nagpaila nga pulos sila maoy tag-iya sa alahas apan wala kini nagpakita og klarong dokumento. - BANAT NEWS