CEBU, Philippines - Milugmaw ang luha sa usa ka job order nga kawani sa kagamhanan sa dakbayan sa Mandaue dihang gipahibalo ni Mayor Jonas Cortes nga himuon nga regular nga trabahante sa city hall isip ganti sa iyang kamatinud-anon.
Kini human mahibaw-i sa mayor nga ang maong kawani makadaghan nang mouli sa mga butang nga iyang makit-an diha sa pansayan.
Si Hermisa Marfe Cejas, nagpuyo sa Zone Paliya sa barangay Cambaro sa dakbayan sa Mandaue gipasidunggan ni Cortes. Si Cejas usa ka kolektor ug magbalantay sa kasilyas.
Sumala pa nga naglakip sa nakaplagan ug giuli ni Cejas sa sulod sa pansayan mao ang P24,500 nga salapi nga gisulod sa bag nga gipanag-iya sa usa ka magpapatigayon og baboy.
Dugang nakaplagan ni Cejas sa sulod sa pansayan ang usa ka pitaka nga gipanag-iya sa usa ka Estrella Palang nga adunay sulod nga P8,000 ug mga mahalon nga cellphone ug uban pa.
Si Cortes dihang nahinabi sa Banat News miingon nga gikalipay kaayo niya nga bisan sa kalisod sa kahimtang karon sa panahon aduna pa nagpabilin nga matinud-anon sama kang Cejas.
Si Market Administrator Mosolini Soliva maoy mipahibalo kang Cortes kabahin sa ilang kawani nilang kanunay nang makapunit og dili magkainteres sa mga butang nga iyang makit-an tungod kay kanunay niini kining ibalik o ipahibalo kanila hinungdan nga mabalik gyud sa hingtungdan. - BANAT NEWS