CEBU, Philippines - Mokabat sa 500 ka mga piniriso sa Cebu City Jail (CCJ) ang nakabenipisyo sa gipahigayong medical, dental ug optical mission kagahapon sa Alpha Phi Omega (APO).
Si Superintendent Maria Victoria Jimenez, officer-in-charge sa CCJ nagkanayon nga 350 kanila ang nagpa-check -up kagahapon ug kasagaran nagpaibot og ngipon, samtang ang uban nagpa-check-up sa mata ug uban pang gipamati sa lawas. Gibutyag ni Jimenez nga sa 2032 ka mga pinirisong lalaki, 17 kanila may sakit nga tuberculosis, samtang 25 ang adunay psychological deficiency.
Apan matud niya nga ang maong mga inmate gibutang sa laing selda nga wala itipon sa kadaghanan ug kanunay usab nga gi- check-up ang lawas uban sa paghatag og tambal.
Gibutyag usab ni Jimenez nga sa 2032 ka mga binilanggo, 80 porsiyento niini nag-atubang og kaso bahin sa ginadiling drugas.
Sa laing bahin, si Jail Chief Inspector Cora Noel kinsa maoy jail warden sa Bureau of Jail Management and Penology sa mga babayeng piniriso sa Cebu City Jail ug miyembro usab sa APO mibutyag nga 80 ngadto sa 100 ka mga babayeng binilanggo gipaubos sa optical check-up tungod kay kasagaran kanila nagkinahanglan na og mga antiyuhos.
Ang maong mga inmates manggama og mga fashion accessories isip ilang pangwartahan ug kung wala silay mga eye glasses dili sila makaklaro sa pagtuhog sa mga kwentas nga ilang himoon.
Wala na sila magpa-check-up sa lawas ug ngipon kay bag-o pa silang gihiling sa mga doctor sa Perpetual Soccour Hospital. Matud niya nga aduna siya’y 189 ka mga piniriso karon diin 80 ngadto sa 85 porsiyento niini nag-atubang sa kaso bahin gihapon sa ginadiling drugas.
Ang mga medical team kagahapon gilangkuban sa ITAU Chapter sa Cebu Doctors College, Alpha XI Chapter sa Velez College ug Alpha Phi Omega, Alpha Mu Chapter.
Si Jail Senior Superintendent Romeo Vio, Regional Director sa BJMP ug miyembro usab sa APO mitambong usab sa maong kalihukan.
Si Magleo Adriano, national president sa APO sa iyang inspirational talk mibutyag nga ang ilang grupo adunay P500 milyones nga balor sa mga proyekto nga nahimo sukad pa kaniadto pinaagi sa ilang mga kalihukan diin matag tuig 500 ka mga pasyente ang makabenipisyo sa ilang ipahigayong medical mission.
Si Dani Carlo Pangatungan, project coordinator ug tigpamaba sa APO nagkanayon nga ang maong medical mission kagahapon maoy ikaduhang higayon nga ilang gihimo.
Matud niya nga P50,000 ang budget nga gigahin nila sa maong proyekto ug kasagarang mi-sponsor niini ang ubang mga miyembro nila nga tua magbase sa gawas sa nasud.
Gibutyag niya nga niining tuiga gawas sa Cebu City Jail nakapahigayon usab sila og medical ug dental mission sa Calatraba, Negros Occidental, Operation Tuli, sa barangay Guadalupe, dakbayan sa Sugbo, Operation Tuli ug dental mission sa barangay Bulacao, dakbayan sa Talisay, Operation Tuli sa barangay Opao, dakbayan sa Mandaue.
Gawas sa medical mission ang APO mopahigayon usab sila og ubang mga proyekto sama sa pagpananom og mga kahoy.
Ang Mobile Dental Clinic Van, YMCA, Rotary Club of Talisay-Cebu, Omnilogy Inc. ug Fil-Am Magtinabangay Foundation Inc. (FAMFI) mitabang usab sa maong kalihukan. - BANAT NEWS