CEBU, Philippines - Gatusan ka mga tawo ang mikaon sa higanteng bibingka nga giluto sa dakbayan sa Mandaue nga gitinguhang makasulod sa Guinness Book of World Records ug ingon pag-promote pa sa ilang produktong bibingka sa tibuok kalibutan.
Ang gatosang mga tawo nagsugod sa pagkaon sa higanteng bibingka diha sa sulod sa basketball court sa Mandaue City Sports and Cultural Center sa sitio Tribunal sa barangay Centro sa dakbayan sa Mandaue ala-una palang sa Miyerkules sa kaadlawon.
Gitugot ang pagpakaon sa maong bibingka human mahuman ang presentasyon niini ug nadokumentuhan aron ilang ipadala ngadto sa Guinness Book of World Records.
Si Mayor Jonas Cortes ug Bise Mayor Glenn Bercede uban sa mga sakop sa konseho, mga barangay opisyal ug mga molupyo sa kabarangayan maoy lakip sa mitambong sa presentasyon ug sila usab ang unang mitilaw niini uban sa mga magtutudlo nga nagluto.
Madasigon ug nahimuot kaayo ang mga tawo nga nagtinabangay sa pagkaon sa higanteng bibingka nga pulos nakaingon nga lami gyud ang bibingka sa Mandaue.
Si Tourism Officer Louella Cabañero miingon nga ang nalutong bibingka 182 ka tiil ang gilapdon, 50 ka tiil ang diyametro ug 5.6 toneladas ang gibug-aton.
Ang maong higanteng bibingka sa dakbayan sa Mandaue nga gigastohan og mokabat sa P500 mil nga kantidad gikan sa mga donasyon sa nagkalainlaing magpapatigayon sa dakbayan ug pribadong sektor. (BANAT NEWS)