CEBU, Philippines - Disiplina sa kaugalingon ug dili kontraseptibo, kini ang gipadayag ni Cebu Archbishop Emeritus Ricardo Cardinal Vidal atol sa iyang wali sa Santos nga Misa atol sa kapistahan sa Shrine of St. Joseph niadtong Sabado didto sa syudad sa Mandaue.
Atol sa maong Santos nga Misa nga gitambungan sa gatusan ka mga debotong katoliko sa Mandaue, wala masipyat si Vidal sa pagtuki sa isyu sa Reproductive Health Bill nga hugot nga gibabagan sa simbahan.
Dungan sa nagkainit nga debate mahitungod sa kontrobersiyal nga RH Bill nga gipasa ngadto sa Kongreso, si Vidal subling mipadayag sa iyang pagsupak ug mipahimangno sa mga katoliko nga ang maong balaudnon dili tubag sa isyu sa pagsaka sa populasyon sa nasud.
“Ang pagbansay diha sa pagpugong sa kaugalingon mao gyud ang timaan sa presensya sa Dios diha sa inyong kalag,” matud pa ni Vidal. “Ang contraceptives gud gidili sa Simbahan tungod kay kini dili makatabang sa self-discipline.”
Gihulagway usab ni Vidal ang mga magbabalaod ug kadtong mga pro-RH bill nga sama sa usa ka konsentidor nga ginikanan nga dili makamao nga modisiplina sa ilang anak.
“Tan-awa pananglit ang bata nga kanunay’ng depensahan sa ginikanan. Bisan unsay buhaton sa bata, ilaha gyung protektahan, mao nga dili na makita sa bata ang koneksyon sa iyang gibuhat ug sa epekto niini,” sigun pa ni Vidal.
Gibutyag usab sa 80-anyos nga kanhi Arsobispo sa Sugbu nga ang rason ug nganong supak ang simbahan sa RH Bill tungod kay inay magdala og kalinaw ug pagmahal, mohimo na hinuon kini og lunangan sa sala ug sa kadautan sa usa ka banay. (BANAT NEWS)