CEBU, Philippines - Moabot na sa 20 ka mga tawo ang gipasakaan og kaso didto sa korte gumikan sa wala pagsunod sa saktong pagpahimutang sa ilang mga basura ilabi na sa wala pag-segregate ug gituohang modaghan pa kini samtang nagdagan ang adlaw.
Sumala pa sa administrative officer sa City Environmental Sanitation Enforcement Team (Ceset) nga si Eric Surban nga ang gipasakaan nila og kaso kadtong nagdumili sa pagbayad sa violation fee nga P500 ug ang pakyas usab nga pagtuman sa community service.
Tambag pa ni Surban ngadto sa publiko nga mas maayong motuman na lang gyud sa balaod aron dili makabayad sa multa ug modako pa gyud ang bayranan niini kung ila na kining mapasaka didto sa korte.
Samtang hasta ang mga barangay tanod gibansay na sa CESET aron makatabang pagbantay ug makapanakop sa mga maghugaw-hugaw ug mahimong makaisyu og citation tickets. (BANAT NEWS)