CEBU, Philippines - Giawhag karon sa buhatan sa Philippine Crop Insurance Corporation (PCIC) ang mga mag-uuma nga nagbuhi og kahayopan sa pagpaseguro niini sa insurance sa gobyerno sama sa PCIC.
Si Alberto Divinagracia nga maoy general manager sa maong buhatan miingon nga sayon na lamang karong panahona alang sa mga mag-uuma sa pagpaseguro sa ilang mga tanom sa kaumahan ug sa mga binuhing hayop.
May gipirmahan na nga memorandum of agreement (MOA) pinaagi ni Gobernador Gwendolyn Garcia kinsa migahin og salapi alang sa pag-abaga sa balayranan sa insurance.
Matud pa ni Divinagracia nga dako kaayo og kapuslanan ang pagkuha og insurance alang sa mga tanom nga mais, mga hayopan sama sa baka, kanding, kabaw, kabayo, manok, baboy ug uban pa tungod kay sa higayong madaot kini o mamatay mugna sa dili maayong kahimtang sa panahon mahimo man silang bayran sa insurance niini.
Gitataw niya nga sama sa usa lang ka baka nga kuhaan og insurance sa tag-iya sa ilang buhatan ang bayranan P600 lamang, apan kun kini mamatay, P10,000 ang madawat sa tag-iya niini.
Si Divinagracia miingon nga dili lang tanom o mga hayop ang kaaplayan og insurance sa ilang buhatan kun dili lakip na usab ang mga mag-uuma mismo kinahanglang magpaseguro. - BANAT NEWS