CEBU, Philippines - Gipahimangnoan sa kapolisan ang katawhan sa pagbantay sa grupo sa mga kawatan nga mopahimulos sa piyesta karong adlawa sa dakbayan sa Mandaue.
Ang pahimangno gihimo sa kapolisan human mawagtang ang bag nga gisudlan sa kapin P500,000 nga cash ug mga akahas ni Carmelita Mangubat Seno nga taga barangay Cambaro, sa maong dakbayan didto sa sulod sa Cebu International Convention Center sa miaging gabii.
Si Inspector Ramil Morpos, hepe sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga kasamtangan na karon nilang gipanid-an ang maong grupo nga nakabiktima na og dinagko nga pagpangawat sa mga mall sa dakbayan sa Sugbo, dakbayan sa Lapulapu ug dakbayan sa Mandaue.
Gipasabot ni Inspector Morpos nga adunay kaubang mga bayot ang maong grupo maoy hinungdan nga dali ra silang makasulod sa mga kalingawan sama sa mga concert, beauty contest ug uban pa. /WC (BANAT NEWS)