CEBU, Philippines - Nawad-an sa iyang P2 mil kaping kinitaan sa pamasahero ang usa ka drayber sa taxi kinsa gitulis sa duha ka lalaki nga iyang pasahero didto sa Zone Pechay, barangay Paknaan, dakbayan sa Mandaue sa miaging kaadlawon.
Ang biktima mao si Bernabe Pena, 40 , minyo, ug drayber sa Mandarin Taxi nga nagdala sa plate number nga GXP 557 nga nagbase sa dakbayan sa Sugbo.Si PO2 Ranjie Lopez sa kapolisan sa Presinto 3 sa Basak Police Station nga nahinabi sa Banat News miingon nga base sa gitug-an sa biktima ngadto kanila, ilang nasayran nga gikan kini sa dakbayan sa Lapulapu ug paingon sa dakbayan sa Mandaue subay sa 1st Mactan Mandaue Bridge.
Sa paghidangat niini sa atubangan sa University of Cebu Lapulapu and Mandaue (UCLM) duha ka batan-ong lalaki ang iyang gihunongan ug mihangyo nga magpahatod sa barangay Paknaan.
Dugang pa sa biktima nga sa ilang pag-abot sa ngitngit nga lugar sa zone Pechay sa barangay Paknaan kalit lang miibot og kutsilyo ang usa sa pasahero nga naglingkod sa luyo nga lingkoranan ug gition sa liog niini dungan ang pagdeklarar nga tulis.
Wala na mopakita og pagsukol ang biktima kay gipasidan-an kini nga patyon.
Si PO2 Lopez miingon nga human makuha ang salapi nga kinitaan sa biktima nga nagkantidad og P2,670 ang duha ka tulisan nagdali sa pagkanaug ug mimando kini sa drayber sa pagduko ug dili gyud pahangdon aron dili sila mapugos sa pagpusil niini.
Dugang pa sa drayber nga milungtad gyud og pipila ka gutlo ang iyang pagduko ug dihang iyang nasuta nga nakapahilayo na ang mga tulisan, dali siyang mipabulhot sa iyang sakyanan ug nangayog panabang sa mga molupyo sa maong lugar kinsa maoy nakataho sa kapolisan.
Gipangita dayon sa kapolisan ang maong mga tulisan. - BANAT NEWS