CEBU, Philippines - Giawhag ni Inspector Ramil Morpos sa Investigation Detection and Management Bureau (IDMB) sa Mandaue City Police Office (MCPO) ang mga biktima sa pagpanulis ug pagpanglabni sa dakbayan sa Mandaue, Lapulapu, Consolacion ug lakip na sa dakbayan sa Sugbo sa pagtan-aw sa grupo sa mga tulisan nga ilang nadakpan sa miaging kaadlawon.
Matud pa ni Morpos nga daku ang ilang pagtuo nga ang nagtulis ug nagpusil patay sa biktima nga si James Lomarda, 22 anyos nga taga dakbayan sa Lapulapu mao usab ang grupo nga kanunay nga manulis ug manglabni nga magsakay pa og motorsiklo.
Si Inspector Morpos miingon nga si Jophet Sanchez nga mitug-an nga maoy nagpusil ngadto kanila nga maoy nagpusil patay kang Lomarda mitug-an ngadto kanila nga makadaghan na sila makabiktima sa pagpanulis sa Metro Cebu area.
Dugang pa ni Morpos nga si Sanchez unang ilang gipasakaan og kaso tungod sa gikatahong pagpusil patay sa barangay Tipolo sa usa sa ilang kauban sa Crips gang.
Si Inspector Morpos miingon nga ilang gipaabot ang pagpatim-aw sa ilang buhatan sa uban pa nga mga biktima sa pagpanulis ug pagpanglabni sa lainlaing lugar sa tinguha nga ilang ikadugang sa pagpasaka og kaso.
Sa nasayran nga gitulis ug gipatay sa grupo ni Sanchez si Lomarda sa sulod sa giluwanan niining PUJ dihang napakyas sila sa pagdala sa kuwentas nga gilabni niini gikan sa biktima.
Si Sanchez ilang nadakpan ni Morpos ug mga kauban sa Mobile patrol sa hot pursuit operation nga ilang gihimo sa miaging kaadlawon.
Dugang nadakpan nga mga kauban ni Sachez nga suspetsado sa pagpanulis mao sila si JV Mauricio Himpit, Argie Dadula, Jerwin Eudencio ug Marl Louie Seno Sanchez nga pulos molupyo sa barangay Tipolo sa maong dakbayan. (BANAT NEWS)