CEBU, Philippines - Naputol ang kalipay sa usa ka ex-convict nga lolo human masakpi nga gipahimuslan ang 13-anyos niini nga silingan samtang ang bata nakuyapan pasado ala-una sa miaging hapon sa sitio Tugas, barangay Marmol lungsod sa Tuburan.
Ang biktima nagpangidaron og 13-anyos samtang ang suspetsado nagpangidaron og 57, usa ka mag-uuma sa maong barangay ug gikatahong ex-convict.
Sa pakighinabi sa Banat News ni SPO3 Jose Relampagos, sa Tuburan Police misaysay kini nga ang konsehal sa maong barangay nga si Letecia Gabilan Capalac mitaho sa ilang buhatan pasado alas- 4 aron itugyan ang suspetsado.
Nasayran sa imbestigasyon sa kapolisan nga nianang pagka ala-una sa hapon ang suspetsado mi-agni sa biktima nga paadto-on sa iyang panimalay tungod kay aduna siya’y ihatag nga surpresa niini.
Tungod sa dakong respeto sa biktima ug pagtahod wala kini magduha-duha sa pag-adto sa panimalay sa suspetsado ug didto giingong gitunolan kini og pan sa suspetsado.
Sa dihang gikaon na kini sa bata, giingong kalit lang siya nga natumba ug nawad-an sa panimuot ug diha gisugdan na sa maong tiguwang ang yawan-ong kahinam sa lawasnong kalipay.
Apan ang uyoan sa biktima nga natingala nga sirado ang panimalay sa suspetsado hinungdan nga iyaha kining gilili sa bintana ug iyang nakit-an ang hubong lawas sa suspetsado ug nga nagpatong sa biktima.
Tungod sa kahadlok sa uyo-an sa biktima tungod sa mga background sa suspetsado nga nakapatay na og tawo, mitaho una kini sa ginikanan sa biktima ug sila nangayo og tabang sa mga barangay officials ug tanod.
Ang pamilya sa biktima ug mga barangay tanod daling miadto sa panimalay sa suspetsado ug didto ilang nasakpan nga wala gihapon makamata ang biktima ug gituohang nalugos na.
Hinungdan nga dali usab nga gipaak sa uyoan ang tikod sa biktima hinungdan nga kini nakamata. Ang bata wala masayod sa gibuhat sa suspek kaniya.
Gihulagway ni Relampagos nga ang biktima nagmulo sa kasakit sa iyang kinatawo, ug gani gihilantan usab kini ug gibati og kakapoy sa iyang lawas.
Midugang usab si Relampagos nga ang pamilya sa biktima ug ang biktima mismo suod kaayo sa suspetsado ug gani tawgon pa kini sa biktima og ‘lolo’ hinungdan nga wala nila damhang mahimo kadto sa suspek.
Matod pa ni Relampagos nga ilang nasuta base sa resulta sa gipahigayon nga check up sa biktima positibo kini nga siya nahilabtan sa maong tiguwang.
Ang pamilya sa biktima pursigido nga mosang-at og kaso batok sa suspetsado nga kasamtangan karun nga nagtingkagol sa kasel sa Tuburan. (EIM)(BANAT NEWS)