CEBU, Philippines - Gitug-an ni Provincial Administrator, Eduardo Habin nga misaka ang kinitaan sa Cebu South Bus Terminal (CSBT) atol sa Semana Santa itandi sa kita niini sa miaging tuig. Matud pa ni Habin nga ang kinatibuk-ang kita sa CSBT sa Semana Santa ning tuiga mikabat og P775 mil gikan sa Abril 18 hangtud sa Abril 22, 2011.
Ang maong income mas dako kaayo kay sa miaging tuig nga mikapin lang sa P600 mil.
Gipasabot ni Habin nga ang nagsakang income sa nahisgutang bus terminal naggumikan sa nagkadaghan nga mga pasahero nga migamit niini.
Kini sukad dumalaha sa kagamhanan sa lalawigan ang maong terminal nga mao nay dangpanan sa tanang pasahero nga mamauli ngadto sa nagkadaiya nilang lungsod sa habagatan ug bisan pa ngadto sa isla sa Negros.
Matud pa ni Habin nga segun sa record, mikabat sa kaping 75 mil ka pasahero ang midagsa sa CSBT niadtong miaging semana tungod usab sa mas gipalambo nga serbisyo sa probinsiya.
Iyang gitataw nga natala sa ilang record nga ang Huwebes Santo maoy may labing daghang pasahero nga mikabat sa 28 mil ka tawo ang mibiyahe.
Dugang pa ni Habin nga gawas sa hugot nga seguridad, maayo ang serbisyo nga gihatag sa probinsya sa Sugbo kay nakapahimulos ug natagbaw gyud ang tanang mga pasahero sulod sa ilang gipakatap nga Medical Team kinsa mipahigayon og libre nga medical assistance sa mga pasahero nga may balatian sa panglawas. (BANATNEWS)