CEBU, Philippines - Napanglantawan ni Mayor Michael Rama nga matun-an na unya ang mga planong naumol alang sa mga proyekto nga makahatag og kalamboan sa Rehiyon-7.
Isip pangulo sa Regional Development Council sa Rehiyon -7, gipadayag sa mayor nga hatagan niya og prayoridad ang taud-taod na nga gipangandoy nga tukoron ang taytayan nga magdugtong sa mga probinsya sa Cebu ug Bohol.
Aminado hinuon ang mayor nga mag-agi gyud og lapad nga pagtuon ang maong proyekto apan iyang nalantawan nga dako kaayo kini og ikatabang ngadto sa mga tawo.
Iya usab nga paghingusgan nga ikapatuman na ang proyekto bahin sa pagpadagan og Bus Rapid Transit (BRT) dinhi sa siyudad sa Sugbo nga makapaluag sa dagan sa trapiko sa dakbayan.
Sayo niini nabalita na dinhi sa Banat News ang gitakdang pagtikang niya sa Malacañang karong Mayo 3 aron manumpa sa iyang posisyon sa RDC atubangan mismo ni Presidente Benigno S. Aquino III.
Human sa maong kalihukan, makigtigom na ang mayor sa mga opisyales sa Rehiyon-7 aron tukion ang suliran nga angayang hatagan og pagtagad. (BANATNEWS)