CEBU, Philippines - Nalubong nga buhi ang usa ka estudyante human kini mataboni sa yuta nga kalit nga midahili pasado alas-11 sa buntag kagahapon sa barangay Corazon lungsod sa Catmon.
Ang natabonan ug namatay nailhan nga si Osias Bocatot, 22, molupyo sa barangay Binungkalan sa maong lungsod.
Sa pakighinabi sa Banat News ni PO3 Januario Sudario, usa sa mga miresponde, mibutyag kini nga si Bocatot uban sa usa ka Dionito Loyloy gisuholan sa usa ka Roy Jamiro sa pagkalot sa likod nga bahin sa iyang panimalay.
Si Bocatot ug Loyloy, misugot sa tanyag ni Jamiro hinungdan nga ilang gikalot ang nagbugdo nga pangpang sa likod nga bahin sa panimalay ni Jamiro.
Apan pipila ka oras ang milabay, samtang nagpala si Loyloy sa mga gipangkalot ni Bocatot kalit lang nga natumpag ang yuta nga gikan sa gikawtan ni Bocatot.
Hinungdan nga maayong pagkatabon niini ni Bocatot, samtang si Loyloy dali usab nga nakapangayo og panabang ngadto sa tag-iya sa panimalay ug sa kapolisan.
Gibana-bana nga 15-minutos gikan sa pagkatabon ni Bocatot usa pa kini nahaw-as gikan sa yuta ug dali usab dayon nga gidala sa Juan Diosdado Memorial Hospital apan gideklarar kini nga dead on arrival.
Matud pa ni Sudario nga base sa ilang gihimong ocular investigation ilang nasuta nga lapad na ang napatag nga yuta nila ni Bocatot ug Loyloy.
Midugang si Sudario nga nagkauyon si Bocatot ug Jamiro nga suholan lang sila og tag 120 ang adlaw bugti sa pagpatag sa pangpang sa likod nga bahin sa panimalay ni Jamiro.
Butyag usab si Sudario nga karung sunod abli sa klase mag 4th year na si Bocatot sa Panalipan National High School ug gani ang iyang pagpangalot og yuta usa lang ka sideline aron usab makakwarta ug makatabang sa pamilya.
Samtang midugang usab si Sudario nga bisan paman og gituohang aksidenti lang ang nahitabo ni Bocatot aduna gihapoy imbestigasyong himuon aron pagpapas sa pagduda kun aduna bay foul play sa kamatayon niini. (BANATNEWS)