CEBU, Philippines - Samaran ang usa ka guwardiya human kini maunay sa iyang armas de fuego didto sa Brgy. Jagobiao dakbayan sa Mandaue kagahapon sa kadlawon.
Ang biktima mao si Mark Joel Maluya, 22, ulitawo ug residente sa brgy. Yati, lungsod sa Liloan ug sakop sa Centurion Security Agency nga nadestino sa Eveready Battery Company sa Brgy. Jagobiao .
Matud pa ni Maluya nga atol sa iyang pag-duty sa mga alas 12:30 kagahapon sa kadlawon nakurat nalang siya dihang sa iyang paglingkod sa lingkoranan kalit lamang nahug ang iyang armas ug mibuto.
Naigo ang iyang walang bahin sa bitiis hinungdan nga gidala dayon siya ngadto sa Cortes General hospital ug hinuon luwas na siya karon sa makuyaw nga kahimtang.
Atol sa imbestigasyon sa kapolisan hugot nga gipanghimakak ni Maluya nga siya nagluya hinungdan nga nakatulog ug nahulog ang iyang armas. Samtang mitambag ang kapolisan nga kinahanglang alerto kanunay ang usa ka guwardiya pinaagi sa pagsusi sa iyang mga kagamitan ilabi na ang iyang armas kung dili ba kini kuyaw sa disgrasya.
Maayo nalang kay siya ray naunay, kay kun may lain pang tawo nga napagan sa iyang kadanghag, sigurado nga adto siya magguwardiya sa sulod sa prisohan, matud pa sa ubang tigpaniid. (BANATNEWS)