CEBU, Philippines - Gipakatap ni Senior Superintendent Anthony Obenza ang iyang mga sakop sa kadalanan sa dakbayan sa Lapulapu alang sa paghatag og kasiguroan sa pagahimoong “Kadaugan Street Party” sa dakbayan nga maoy hinungdan sa pagsirado sa pikas habig sa dalan M.L. Quezon sa paghatag og kahigayonan sa mga contingent nga makasalida pag-ayo sa maong indigay nga pagahimoon.
Kaabag usab sa kapolisan sa pagpatuman sa kahapsay ug kalinaw sa maong dalan ang mga barangay tanod sa kabarangayan sa dakbayan, mga Barangay Intelligence Network (BIN) Unified Task Force (UFT) ug mga sakop sa radio group sa dakbayan.
Si Obenza maoy gitahasan ni Mayor Paz Radaza sa paghatag og kasiguroan sa kadalanan batok sa mga dautang elemento nga mopahimulos usab sa kahigayonan atol sa maong kalihokan.
Nunot sa pagtak-op sa pikas habig sa dalan sa M. L. Quezon Avenue sa barangay Pajo ug hangtod na ngadto sa city hall, gamiton usab kini sa mga mosalmot sa dagan nga gitawag nga “run for a cause’ atol sa maong adlaw.
Si Konsehal Harry Don Radaza sa iyang pamahayag miingon nga ang run for a cause ilang gihimo sa pagpahimulos sa kahigayonan nga gitak-opan ang dalan ug makahatag usab og higayon sa mga runner nga makatampo sa ilang donasyon.
Gitataw ni Radaza nga ang donasyon nga matigom sa mosalmot sa pagdagan ilang ihatag ngadto sa nasud sa Japan nga nakasinati og grabeng katalagman sa miaging bulan niining tuiga.
Si Frank Brazil nga maoy pangulo sa City Traffic Management System (CMS) sa dakbayan nga nahinabi sa mga tigbalita miingon nga ilang gidili sa mga sakyanan ang pag-parking sa kadaplinan sa gitak-opan nilang dalan.
Matud pa ni Brazil nga adunay towing company nga ilang gi-hire sa maong adlaw nga maoy moguyod sa mga sakyanan nga i-parking sa mga daplin sa karsada sa maong higayon. (BANATNEWS)