CEBU, Philippines - Kasong pagpangawat ang atubangon sa usa ka jailguard sa Cebu Provincial Detention and Rehabilitation Center human kini gipasanginlang maoy responsable sa pagpalusot sa 35 ka sakong bugas sa NFA gikan sa bodega sa bilanggoan niadtong Lunes sa hapon.
Giangkon ni PG1 Antonieto Babor nga siya ang nagpagawas sa sinakong bugas luwan sa CPDRC van human giingong gitawagan siya ni Wilson Ramos, rice costudian sa buhatan sa Provincial Social Welfare and Development.
Ang sinakong bugas giingong ipahatud ni Ramos sa Ecotech sa Sudlon, Lahug, dakbayan sa Sugbo.
Apan gihimakak ni Ramos ang pasangil ni Babor sanglit bakasyon siya niadtong Abril 25 ug 26.
Matud pa ni Babor nga paghiabot niya sa may DepEd, Sudlon, lima ka tawo ang mipahunong kaniya ug maoy midawat sa 35 ka sakong bugas ug gibalhin sa L300 van nga sakyanan.
Sa gihimong imbestigasyon, nasayran nga tulo ka sakong bugas ang gihatud sa balay ni Babor apan ang naulahi nangangkong hinatag kini ni Gob. Gwendolyn Garcia kaniya isip konsumo.
Si Capitol consultant on peace and security, Col. Cesar Veloso nagduda sa mga pamahayag ni Babor.
Matud pa ni Veloso nga paladman pa nila ang imbestigasyon tumong sa pagsusi sa posibling mga kakonsabo ni Babor sa iyang anomaliya.
Si PSWD Officer Marivic Garces nagkanayun nga siya ang biktima niini sanglit ang bugas ila sa buhatan ug didto lang gideposito sa bodega sa CPDRC.
Nasagmuyo si Garces sa taho nga siya ang gibasol sa pagkahanaw sa bugas nga unta siya man ang biktima. (BANATNEWS)