CEBU, Philippines - Usa ka lolo kinsa giingong hubog ug nagbitbit og sundang ang mihasi sa usa ka sugalan tungod sa giingong pagpunay og sugal sa asawa niini kagahapon sa alas 2:30 sa hapon diha sa Sincere Homes Subdivision, barangay Cansojong, dakbayan sa Talisay.
Ang suspetsado mao si Archimedes Brioso, 70, residente sa maong dapit gireklamo sa caretaker sa sugalan nga si Patrocinio Villanueva, 56 ug residente usab sa maong dapit.
Si Villanueva nangayo og panabang sa mga polis dihang giingong gihasi siya ni Brioso.
Sila si PO1 Jue Enemecio ug PO1 Euwen Pitogo ang daling miresponde sa maong report diin ilang naaktohan ang suspetsado kinsa giingong hubog ug nagbitbit og sundang nga dunay gitas-on nga 20 ka pulgada.
Si SPO2 Jerome Abatayo, ang duty jailer sa detention cell nga nahinabi sa Banat News kagahapon nagkanayon nga ang mga igsuon nga babaye sa suspetsado misulti ngadto kaniya nga nasuko kini tungod kay ang iyang asawa magpunay lang og sugal diha sa sugalan.
Ug dihang nahubog kini miadto sa sugalan ug nagwara-wara sa sundang apan wala didto ang iyang asawa ug ang iyang nakaengkwentro si Villanueva.( /EIM) (BANAT NEWS)