CEBU, Philippines - Mimando si Mayor Michael Rama sa Cebu City Police Office sa pagpahigayon og lawom nga imbestigasyon kalabot sa duha ka mga lalaki nga napalgang gisulod og sako nga may daghang samad tinigbasan sa kalawasan diha sa sitio Tupas, barangay Taptap niining dakbayan.
Matud pa ni Rama nga makaalarma kaayo ang maong panghitabo ug iyang panghinaot nga dili na kini mausab.
Kahinumduman nga napuno sa tinigbasan ang mga biktima nga sila si Glenn Perez Parawan, 32, ug Manuel Edgardo Yray Parawan, mga residente sa barangay Maslog sa siyudad sa Danao.
Nasayran nga wala na’y kinabuhi ang mga biktima sa dihang naabtan sa kapulisan ug wala pa matino ang motibo sa krimen.
Gidudahan nga gi-salvage ang duha sanglit gawas nga nabulit og samad tinigbasan sa ulo ug nawong aduna sad silay mga packaging tapes sa ilang mga liog.
Samtang gipahibalo ni Cebu City Police Office Director Melvin Ramon Buenafe nga duna na silay lead kung si kinsa ang responsable sa maong krimen ug kini nalambigit sa ilegal nga drugas.
Kini dihang nadakpan sa kapolisan ang ig-agaw sa mga biktima nga si Cloyd Arias, 31, nga taga barangay Maslog siyudad sa Danao diin magpuyo ang mga biktima.
Si Arias nga nahinabi sa mga tigbalita hugot ang pagtuong ang pagpatay sa iyang mga ig-agaw may kalambigitan kini sa iyang pagpusil patay kang Waldemar Pacis, 36, niadtong Huwebes Santo sa buntag diha sa barangay Sambag 2.
Si Arias mikumpisal nga iyang gipusil patay si Pacis atol sa ilang panaglalis human ang naulahi napakyas paghatag sa P5 mil nga kantidad sa shabu nga iya untang gipalit.
Tungod niini nagtuo siyang ang mga kauban ra usab sa iyang gipusil maoy mibawos ug mipatay sa iyang duha ka ig-agaw. Iya hinuong gipanghimakak nga duna siya’y kuyog nga duha ka lalaki niadtong higayona.
“Naa daw koy kuyog duha. Naalaan lang nila akong mga ig-agaw. Mga inosente to. Gidamay-damay lang nila ang way labot,” matud pa ni Arias kinsa mihagit sa mga responsable sa pagpatay sa iyang duha ka ig-agaw nga makig-atubang kaniya. - BANAT NEWS