CEBU, Philippines - Gidemalas o dimalason na gyud hangtud sa hangtud ang mga dautang elementong buot mamiktima sa umaabot nga panahon diha sa Mambaling Flyover human usa kanila ang nadakpan ug gikuninitan sa mga nagpakabanang mga tawo kagahapon.
Ang tulisan nailhan nga si Jeffrey Pulgo, 30, taga sitio Tinabangay sa barangay Mambaling ug laing giila lamang nga Wendell gigukod sa usa ka motoristang si Felix Panugaling, 43.
Si Panugaling kinsa napusilan ni Pulgo diha sa walang bukton migukod sa mga suspek human nila tulisa si Lovely Hubahid, 17, diha sa barangay Punta Prinsesa sa utlanan sa barangay Mambaling.
Matud pa ni PO3 Diosdado Andales nga base sa ilang imbestigasyon ang biktima naglingkod sa usa ka lingkoranan dihang naagian sa mga tulisan ug kalit gitionan og armas gibunlot ang iyang cellphone.
Tungod sa kahadlok ni Hubahid iyang gihangyo ang tulisan ug nagpakiluoy nga dili siya pusilon ug human matunol ang cellphone daling misibat ang duha luwan sa bisekleta.
Sa dayon nang ikyas sa duha kalit misinggit si Hubahid ug kini nadunggan ni Panugaling nga miagi sa maong lugar hinungdan nga dali kining migukod hangtud nga sila naabtan sa tiilan sa maong flyover.
Si Panugaling mibangga sa bisekleta sa mga tulisan hinungdan sa pagkalimbuwag sa duha apan si Pulgo daling nakapusil kaniya ug ang iyang kauban mikaratel og dagan.
Ang mga estambay daling miresponde ug gikuninitan hangtud naputos og lagom ug bun-og sa kalawasan.
Nabawi gikan kaniya ang usa ka kalibre .357 rebolber nga may tulo ka mga buhing bala ug tulo ka basiyo niini ingon man ang cellphone sa biktima. Samtang gidala sa Cebu City Medical Center si Panunggaling. - BANAT NEWS