CEBU, Philippines - Gibutyag ni provincial board member Jose Ma. Gastardo kinsa maoy Vice Chairman sa Cebu Provincial Anti Illegal Fishing Task Force nga gibana-banang mokabat sa kapin 3 milyones ka dolyar ang balor sa nasakmit sa maong grupo nga mga budjong karong tuiga.
Kini tungod kay matud pa ni Gastardo nga ang tanang nasakmit nga mga budjong mikabat sa 600 ang tanan.
Matud pa ni Gastardo nga ang maong kantidad wala pa gani maglakip sa ubang mga butang ilawom sa kadagatan sama sa mga mahalong corals mga bato nga nasakmit sa maong puwersa.
Dugang pa niya nga pinaagi sa suporta ug pakigtambayayong sa mga nagkadaiyang ahensya sa gobyerno sama sa National Bureau of Investigation (NBI), Criminal Investigation and Detection Group ( CIDG) ug uban pa, mas napadali ang pagsakmit sa maong mga corals.
Giasoy usab ni Gastardo nga ang mga isla, ug mga pantalan sa tibuok Probinsya sa Sugbo gibutangan og mga sakop sa anti-illegal fishing task force aron daling madiskitaan ang nagpayuhot og mga coral ingon man mga isda nga gikuha pinaagi sa illegal nga matang sa pangisda.
Dugang pa ni Gastardo nga ang kapin sa usa ka toneladong coral nga nasakmit sa task force anaa ipundo karon sa bakanteng lote nga gipanag-iya sa probinsya sa Sugbo.
Nasayran nga ang maong task force giumol ni Gobernador Gwendolyn Garcia aron mapreserbar pa ang kalikupan ug usab aron sa pagsikop sa mga illegal nga mananagat. - BANAT NEWS