CEBU, Philippines - Gipaniguro ni Acting Vice Governor Agnes Magpale, kinsa maoy chairman sa Provincial Council for the Welfare of Children (PCWC) nga magpadayon ang kagamhanan sa lalawigan sa Sugbo ubos sa administrasyon ni Gov. Gwen Garcia sa pagpahingusog sa kampanya batok sa cyber sex ug pornograpiya.
Kini nunot sa nagsakang kaso kalabot sa pagpangabuso sa mga kababayen-an lakip na ang mga kabataan.
Matud pa ni Magpale nga ang probinsya sa Sugbo padayong mihatag og tabang pinansyal ingon man legal assistance ngadto sa mga nabiktima sa maong pang-abuso.
Dugang pa niya nga tungod sa task force nga gi-umol ni Gobernador Gwen Garcia nga mao ang anti-human trafficking task force nga gisalmutan sa mga nagkadaiyang national government agencies sama sa Department of Justice DOJ, CIDG, NBI ug uban pa, mas mapadali ang ilang pagsumpo sa maong krimen.
Sa samang higayon gipabantayan karon sa mga opisyal sa kalungsoran ug dakbayan ang mga internetan sa ilang tagsa-tagsa ka lugar gumikan sa mga taho nga kasagaran sa mga tag-iya og internetan nahilambigit sa mga sindikato sa cyber sex.
Kini pinaagi sa paghaylo sa mga dalagita og tag P100 o P200 aron maghubo sa atubangan sa camera nga sud-ongon usab sa mga langyaw nga kontak sa sindikato dinhi sa nasud.
Maoy hinungdan nga giawhag ni Magpale ang mga ginikanan sa pagmonitor sa ilang mga anak ilabi na kun mga babaye kini nga kun maalinggatan nila nga daghan kini og kuwarta, pihuon kun kinsay naghatag kaniya sa maong kuwarta. - BANAT NEWS