CEBU, Philippines - Daghang balay kahilayan sa Sugbo nga wala makakuha og business permit nga gituohang nahimo na lamang gatasan sa kapolisan nga mosulod niini nga maoy nakaaghat karon sa mga lokal nga kagamhanan sa paghimo na og higpit nga mga lakang.
Si Lolita Ganapin nga maoy executive officer sa Bidlisiw Foundation mibutyag sa Banat News nga mokabat sa 18 ka balay kahilayan sa dakbayan ang kasamtangang sakop sa New Mandaue City Entertainment Board Association (NEMCEBA) ug sa maong gidaghanon ilang nasuta nga unom niini wala pa maka-renew sa ilang business permit.
Gitataw niya nga dako ang iyang pagtuo nga daghan pang mga balay kahilayan ang wala magpasakop sa maong kahugpongan ug daku usab ang posibilidad nga wala kini molukat og business permit .
Si Ganapin miingon nga ilang gihigpitan ang pag-monitor sa mga balay kahilayan sa tuyo nga kalikayan ang sakit nga anha kasagaran maggikan sa maong mga lugar sama sa STD, HIV/ AIDS ug uban pa.
Dugang pa niya nga dili makahatag og kasulbaran ang higpit nga pagpatuman sa balaod labot sa kababayen-an nga nagbaligya sa ilang kadungganan sanglit mahimo man nga mobalhin ngadto sa laing lugar ug lisod na hinuon ang pag-monitor niini.
Giangkon ni Ganapin nga ang kalisod sa panginabuhi maoy nag-unang hinungdan ning maong kababayen-an sa pagsulod sa maong matang sa trabaho.
Si Ganapin miingon nga kasamtangan usab nilang gihimo ngadto sa maong mga kababayen-an ang pagpaubos sa values formation seminar uban sa abag sa ubang buhatan sa kagamhanan. (BANATNEWS)