CEBU, Philippines - Patay ang usa ka langyaw human kini makabangga og laing sakyanan didto sa barangay Ibo, dakbayan sa Lapulapu sa milabay’ng hapon.
Ang biktima mao si Ernest Williams, 28, ulitawo, American national nga taga Virginia, USA apan kasamtangang nagpuyo sa barangay Banawa, dakbayan sa Sugbo.
Base sa imbestigasyon ni SPO2 Rogelio Trinidad sa Traffic Division sa dakbayan sa Lapulapu nasuta nila nga sa alas 12:05 sa milabay’ng udto si Williams nagsakay sa iyang motorsiklo subay sa national highway sa Brgy. Ibo gikan sa Brgy. Punta Engano dihang kalit kining mi-overtake sa sakyanan nga iyang gisunod dihang nasugatan niya sa pikas lane ang nagbaguros nga sakyanan ni Rene Viagedor, 42, minyo, nga taga Brgy. Gabi lungsod sa Cordova.
Wala na makakontrolar sa ilang mga sakyanan ang duha ug sa maong higayon si Williams maoy nalagpot sa iyang gisakyan ug sa pagtugpa niini maayong pagka-ugbok sa iyang ulo sa aspaltadong karsada hinungdan sa iyang kamatayon.
Nadala pa siya sa tambalanan apan pipila ka takna ang nakalabay nakabsan kini sa kinabuhi. Samtang si Viagedor pormal nga mitahan sa iyang kaugalingon ngadto sa kapolisan ug nagpahayahay na siya karon sa prisohan. - Ug Mie Rubie Licera (BANAT NEWS)