CEBU, Philippines - Nahawan ang merkado publiko sa dakbayan sa Lapulapu human gub-sa demoltion team sa kagamhanan sa dakbayan ang mga stall sa sulod niini sa miaging Domingo.
Gisugdan sa alas 10:00 sa buntag ug nahuman sa alas 5:00 sa hapon ang demolition team gipangunahan ni City Administrator Teodolo Ybañez, sa maong dakbayan.
Wala makahuygo ang mga vendor sa ilang tinguha nga pagbabag sa demolition team nga migusbat sa ilang mga stall tungod ka yang puwersa sa kapolisan maoy mipaluyo sa maong grupo.
Matud pa ni Ybañez nga gipangguba nila ang mga lamesa ug mga tindahan sa merkado tungod sa kaabusado sa mga vendor nga wala na magtagad sa ilang bayranan sa multa ug uban pa nilang obligasyon sa ilang pagpaninda sa maong lugar.
Midugang si Ybañez nga kun nagtinariong pa lang unta ang mga manindahay sa ilang panginabuhi dili unta sila silotan sa kagamhanan pinaagi sa pagpapahawa gikan sa maong lugar.
Usa sa pangabuso sa mga manindahay mao ang dili pagluykat nila og linsensya sa ilang negosyo, sumala ni Ybañez.
Sa gipatumang multa sa kagamhanan batok sa mga manindahay nga walay lisensya, si Ybañez miingon nga daghan nang miabuso niini nga luyo sa nagpatongpatong nga multa wala na gyud magtagad sa ilang bayranan hinungdan nga naupos na ang pailob sa gobyerno , matud pa niya.
Si Elena Caballes ang Market Administrator sa maong dakbayan nagkanayon nga ang gihimo sa demolition team , para ra usab sa kaayohan sa tanan.
Mahinumdoman nga kasagaran sa mga vendor nga naapektahan sa maong demolition mao kadtong naa sa agianan sa merkado nga nakabalda kaayo sa mga mamalitay sa sulod. (BANAT NEWS)