CEBU, Philippines - Nalandig sa tambalanan ang usa ka 22-anyos nga lalaki human kini makaangkon og mga bun-og ug pangos sa iyang lawas dihang paglihay niya sa checkpoint sa kapolisan apan didto modaro sa multicab ang motorsiklong iyang gisakyan didto sa barangay South Poblacion, dakbayan sa Naga sa miaging gabii.
Ang nalandig sa tambalanan mao si Wenclen Gabugason, taga barangay Tinaan sa nahisgutang siyudad ug drayber sa XRM nga motorsiklo kolor itom nga nagtangag sa plakang GM-4271.
Ang multicab nga nagtangag sa plakang GNE-494 nga gidaro ni Gabugason gimaneho usab ni Claudio Trongcao, 54, nga taga Tinago Island sa nahisgutan usab nga siyudad.
Si PO1 Renjie Nadora, duty desk officer sa Naga Police Station nga nahinabi sa Banat News kagahapon nagkanayon nga si Gabugason nagbiyahe paingon ngadto sa amihanang bahin apan dihang nakita ang mga polis nga nag-checkpoint kalit kining mipa-u-turn o mipatuyok sa iyang motorsiklo aron makalikay sa checkpoint.
Nakaikyas siya sa check point, apan wala siya kaikyas sa multicab nga gikasugat niya Si Nadora nagkanayon nga wala hisayri nganong milikay si Gabugason sa check point. (BANAT NEWS)