CEBU, Philippines - Personal nga gitunol sa miaging adlaw ni Provincial Administrator Eduardo Habin ang hinabang financial sa kagamhanan sa lalawigan sa Sugbo.
Ang midawat sa P30 mil mao si Rolando Cabunilas ang bana ni Ivy Jane Cabunilas, 33, nga taga lungsod sa Consolacion, usa sa mga nabiktima sa linog sa New Zealand.
Si Rolando nagpasalamat kang Gobernador Gwendolyn Garcia ug giisip niya ang maong tabang makatapak-tapak sa mga galastohan nila sa pagpahiluna sa pagpalubong sa iyang asawa nga namatay didto sa New Zealand.
Ang maong hinabang maoy katumanan sa gisaad sa gobernador alang sa pamilya sa matag OFW nga Sugboanon kinsa nabiktima sa maong trahedya didto sa New Zealand. (BANAT NEWS)