CEBU, Philippines - Namatay ang usa ka 38-anyos nga lalaki kinsa giingong hubog nga naligo sa dagat sa barangay Simala, lungsod sa Sibonga, kagahapon sa alas 9:30 sa buntag.
Ang namatay mao si Ramil Adlawan, residente usab sa nahisgutang dapit.
Si PO2 Dandie Mulo sa Sibonga Police Station kinsa usa sa mga miresponde sa insidente mibutyag sa Banat News nga si Ramil giingong hubog mikuyog sa iyang ig-agaw nga si Raquel Adlawan, 39, ug mga anak niining nangaligo sa dagat sa ilang dapit.
Pag-abot sa dagat si Ramil giingong misaka sa parel nga ambakanan ug misawom kini apan wala na motunga sulod sa pipila na ka gutlo, busa nabalaka si Raquel ug nanawag siya og panabang sa ilang mga silingan.
Si Ramil napalgan sa ilang mga silingan sa kilid sa parel nga ambakanan naglutaw nga wala nay kinabuhi.
Si Mulo nagkanayon nga naandan na ni Ramil nga maligo sa dagat kung kini mahubog.
Ang maguwang ni Ramil nga si Avelino Adlawan nagdumili sa pagpa-autopsy sa patay’ng lawas sa iyang igsuon tungod kay wala silay nakitang foul play sa kamatayon niini. Si Mulo midugang nga wala usab silay nakitang samad sa ulo ug lawas ni Ramil nga timailhan nga naigo kini sa bato pagsawom niini. (WC) (BANAT NEWS)