CEBU, Philippines - Hayan nga ma-stabilize na unya ang presyo sa kuryente sa Isla sa Bantayan kun ikapatuman na ang gitawag nga Biomass Power Plant (BPP) sa maong isla, matud pa sa kanhi presidente sa National Power Corporation Guedo Del Gado .
Ang posibilidad sa pagtukod og BPP sa isla sa Bantayan gihisgotan atol sa panagtagbo ni del Gado ug ni Gobernador Gwendolyn Garcia kauban ni 4th District Rep. Benhur Salimbangon, Bantayan Mayor Ian Christopher Escario ug uban pa mga lokal nga opisyales sa nahisgutang Isla.
Matud pa ni Gobernador Garcia nga daghan og matampo nga kaayohan ang katumanan sa nahisgutang planta.
Gani gikatakda nga sugdan ang pagtukod sa nahisgutang planta karung umaabot nga Agusto ning tuiga nga humanon sulod sa tulo ka tuig.
Sa nasayran nga ang BPP usa ka klase sa planta sa enerhiya nga mogamit og mga biodegradable waste kon basurang malata alang sa pagpabuga og kuryente.
Ang isla sa Bantayan haum kaayo ning proyektoha tungod sa kaabunda sa hugaw sa manok sa maong lugar.
Hinuon si Bantayan Mayor Ian Cris Escario nagkanayon nga iya unang sutaon kung maka-supply ba ang mga ite sa manok sa ilang lungsod alang sa nahisgutang power plant. - (BANAT NEWS)