CEBU, Philippines - Si Mayor Socrates Fernandez sa dakbayan sa Talisay mibahad nga dili siya modupa sa mga traysikol nga walay franchise sa higayong dakpon kini sa mga tinugyanan sa trapiko sa syudad.
Kini tungod kay sa planong higpit nga pag-implementar sa balaod batok sa mga traysikol nga walay franchise sa dakbayan gituohan nga ang mga apektadong drayber moduol gyud ug magpalaban sa mayor.
Apan si Fernandez nga nahinabi sa mga tigbalita nagkanayon nga iyang respetohon ang City of Talisay-Traffic Operations Division Authority (CT-TODA) sa operasyon niini batok sa mga traysikol nga walay mga franchise.
Kahinumdoman nga sa kapin sa 4,000 ka mga traysikol ang nag-operate sa siyudad, kapin lang sa 1,000 niini ang dunay mga franchise.
Gikataho usab nga uban sa maong mga traysikol nga walay mga franchise naggikan sa mga silingang lungsod ug dakbayan sa Talisay.
Matud ni Fernandez nga kadtong mga traysikol nga dili taga Talisay hangyoon lang nga mobalik ngadto sa ilang mga lugar ug dili na diha mamasada sa Talisay.
Ug kadtong mga taga Talisay susihon kung nakatuman ba kini sa mga panginahanglan.
Si Fernandez midugang nga respetohon niya ang pag-implementar sa CT-TODA sa mga lagda batok sa mga traysikol nga walay mga franchise.
Sa milabay’ng adlaw giaprobahan na sa konseho sa Talisay ang ordinansa kabahin sa P8 nga plitehan sa traysikol ug ang mga operator hatagan unya og kopya sa maong ordinansa aron makapangolekta na kini sa bag-ong plitehan.
Sa maong sitwasyon mailhan na unya ang mga traysikol nga walay rehistro tungod kay dili man kini kahatagan og kopya sa ordinansa.
Si Bise Mayor Alan Bucao nagkanayon nga mogama ang CT-TODA og lakang batok sa nahisgutang traysikol nga walay mga franchise.
Usa sa lakang nga ilang giplanohan mao ang reward system diin kadtong mga drayber sa traysikol nga makasumbong og unit nga walay franchise hatagan og reward. (WC) - (BANAT NEWS)