CEBU, Philippines - Ang City Intelligence Branch (CIB) sa Cebu City Police Office mipahibalong aduna sila karoy linahi nga watch lists niadtong mga polis nga giingong ‘protectors’ sa mga drug lords ug drug pushers.
Matud pa sa hepe sa CIB, Supt. Romeo Santander nga nasayod sila kun si kinsa kadtong mga polis nga giingong nalambigit sa gibutyag ni Calamba Kapitan Victor “Jojo” Quijano.
Apan ang maong listahan gikinahanglan pa niya nga ma-iberipika tungod kay basin og lain ang gitumbok ni Quijano nga sakop sa PNP. Ang maong mga polis nga naa sa listahan kasamtangan na nilang giimbestigar.
Kagahapong adlawa, gikatakdang makigkita si Santander kang Quijano aron magkumparar sa mga listahan nga anaa nila.
Midugang usab si Santander nga mosumiter usab sila og report sa buhatan sa Regional Internal Affairs Service (RIAS) kalabot sa mga polis nga nalambigit sa ilegal nga drugas. Samtang mipasabot si Santander nga isip kapitan sa barangay responsibilidad ni Quijano nga mokooperar sa kampanya batok sa ilegal nga drugas.
“As a village chief of that barangay, iya unta nga responsibility nga ma-identify ang mga drug areas para maka-take sila og action and so that he could coordinate with the police. Dapat naa sad siyay gihimo in his level,” pasabot pa ni Santander.
Matud pa ni Santander kun di hinganlan ang maong mga polis mogara kini ug mahimong gatasan ang mga drug lords. (EIM) (BANATNEWS)