CEBU, Philippines - Patay nang nadangat ang usa ka kaswal nga kawani ug janitor sa lungsod sa Oslob human kini gisul-an sa sakit nga patol atol sa oras sa iyang trabaho samtang mipahuway sa public plaza sa barangay Poblacion sa lungsod sa Oslob niadtong Martes sa alas 3:00 sa hapon.
Ang namatay pag-abot sa tambalanan mao si Eduardo Gumapon Guaren, 39, kaswal nga kawani sa munisipyo ug nagpuyo sa maong lugar.
Matud ni PO1 William Cordova sa Oslob Police Station dihang nahinabi sa Banat News naglingkod sa bangko nga kahoy sa public plaza si Guaren dihang kalit kining natumba ug nagbuwa-buwa ang baba. Dali kining gitabang sa mga kauban ug gidala sa Oslob District Hospital apan si Dr. Gina Javier mideklarar kaniyang patay na.
Ang asawa ug kabanay sa biktima dihang gisukit-sukit sa kapolisan mibutyag nga aduna kini sakit nga patol ug duna sab kini sakit sa kasingkasing. - BANAT NEWS