CEBU, Philippines - Gipaundang una ni 6th District Congressman Gabriel Luis Luigi Quisumbing ang trabaho sa vertical school building project sa iyang distrito.
Kini nunot sa nahitabong linog nga miigo didto sa nasud sa Japan niadtong miaging bulan nga misangpot sa pagtumaw sa tsunami ug pagbuto sa nuclear power plant nga mikalas og kaliboan ka mga tawo sa maong nasud.
Sumala pa ni Quisumbing nga niining sunod -sunod nga mga linog sa mga dagkong kanasuran makapabalaka na kaayo busa dili angayang ipadayon ang pagpatrabaho og tag-as nga mga school building.
Kini aron dili makompromiso ang mga kinabuhi sa mga kabataan, matud pa ni Quisumbing.
Giklaro sa kongresista sa ika-unom nga distrito nga dili kaayo lig-on ang mga building dinhi sa nasud sanglit dili man kaayo dako ang gahin nga gisitar sa gobiyerno alang sa maong mga proyekto. Sa higayon nga may linog nga moabot dinhi sa nasud, si Quisumbing nahadlok nga walay mobarog nga mga tag-as nga building sa eskuylahan busa delikado kaayo ang kinabuhi sa mga kabataan.
Dugang pa niini nga mas maayo nga ang usa lamang ka andana nga school building ang ipatukod aron dili masakripisyo ang kinabuhi sa nagtunghang mga kabataan. - BANAT NEWS