CEBU, Philippines - Hangtod karon wala makonpirmar sa kapolisan sa dakbayan sa Talisay ang pasangil nga ang pagpangabit sa usa ka asawa maoy hinungdan sa paghikog sa miaging adlaw sa bana niining handler sa manok sa Camella Homes, barangay Lawaan, sa maong dakbayan.
Si PO3 Mike Espina sa kapolisan sa Talisay mibutyag sa Banat News nga padayon pa nilang gisusi karon ang tinuod nga hinungdan sa paghikog ni Valentino Lodevise, 25, lumad nga taga Guihulngan, Negros Oriental, apan nagpuyo kini sa Camella Homes sa barangay Lawaan tungod kay nagtrabaho siya isip handler kon tig-atiman sa mga manok igtatari ni Engr. Elizar Macabinguil sa maong lugar.
Matud ni Espina nga nakadungog lang sila og estorya ug gani gibalita sa TV nga nakigduwa kuno og laing team ang asawa ni Lodevise, apan wala sila makakonpirmar niini.
Si Lodevise napalgan sa kauban niining si Alimar Villacampo nga nagbitay sulod sa payag nga katulganan niini niadtong Martes sa buntag.
Matud pa ni Villacampo nga nakurat nalang siya dihang sa pagsil-ing niya sa sulod sa payag maoy misugat sa iyang panan-aw ni Lodevise, nga nagbitay ug may hikot nga pisi ang liog niini kansang tumoy gigaid sa sagbayan sa payag ug wala na kini kinabuhi nga nagkumabit sa pisi.
Si Villacampo mitug-an sa kapolisan nga wala gayud silay timailhan nga maghikog si Lodevise kay maayo man kining nakig-estorya kanila sa wala pa kini magbitay sa sagbayan.
Bahin sa giingong pagpangabit sa asawa niini, ang kapolisan nagkanayon nga lisud kaayong ikonpirmar ang hitabo kun wala silay ebidensya nga ika-presentar ngadto sa publiko kalabot sa maong isyu. (BANATNEWS)