CEBU, Philippines - Gikatakdang mo-leave una si Lapulapu City Lone District Congressman Arturo Radaza sa sunod bulan niining tuiga alang sa pagpa-opera sa naligas nga bukog sa iyang spinal column.
Si Mayor Paz Radaza ang kapikas sa kongresista nga nahinabi atol sa press conference miingon nga adto sa Florida sa nasud sa Amerika si Kong. Radaza magpa-opera.
Sumala pa niya nga ang kongresista nakasinati sa maong kakulian sa iyang panglawas dihang naaksidente ang sakyanan niini pipila na ka tuig ang nakalabay.
Gipasabot sa mayor nga ang kadaot nga nahiaguman sa kongresista kaniadto padayon niyang gidala hangtud karon ug mao kini hinungdan nga dihang gipahigayon ang botasyon sa ubos Balay Balauranan alang sa impeachment proceeding kang Ombudsman Merceditas Gutierrez wala kini makatambong. (BANAT NEWS)