CEBU, Philippines - Mikabat sa 30 ka gagmay’ng pakite sa plastic nga gisudlan sa gituohang shabu ang nasakmit sa kapolisan gikan sa usa ka negosyante og ginadiling drugas didto sa Sitio Sto. Niño Sambagan, barangay Cogon lungsod sa Cordova sa miaging hapon.
Ang nadakpan mao si Jimboy Abanez, 21, ulitawo ug molupyo sa nahisgutang lugar.
Ang kapolisan sa Cordova ginangulohan sa hepe niini nga si P/Insp. Jonas Tajanlangit mironda sa barangay Cogon ug sikbit nga mga lugar niadtong tungora.
Nasayran nga ang suspek nga diha sa daplin sa karsada niadtong tungora nakig-estoryahay sa usa ka gituohang kustomer, ug wala makalikay dihang kalit nga girikisa ang iyang lawas.
Kini tungod kay may nakapahibawo sa kapolisan bahin sa illegal nga patigayon sa suspetsado.
Nasakmit sa kapolisan gikan sa suspetsado mao ang 30 ka gagmay’ng sachet nga adunay sulod nga gituohang shabu nga wala pa matino ang kantidad. - BANAT NEWS