CEBU, Philippines - Gibanabanang P5 milyones nga kantidad sa gituohang cocaine brick ang nakuha ug mga armas gikan sa lima ka mga suspek, duha kanila mga babaye sa pagpayuhot og ilegal nga drugas atol sa buybust operation sa kapolisan kagahapon sa kaadlawon sa barangay Mantuyong dakbayan sa Mandaue.
Ang mga nadakpan mao sila si Dandy Sultan, Parhana Ibrahim, Ali Dimasangay, Raisa Dilinogon ug Palawan Dilukunog nga pulos taga Mindanao ug temporaryong nagpuyo sa maong dapit.
Ang grupo ni Sr. Insp. Henrich Bancolita sa City Anti-Illegal Drugs Special Operations Task Force nakadawat og impormasyon kabahin sa pagpamaligya og ilegal nga drugas ni Ibrahim sa maong dapit hinungdan sa gilusad nga operasyon.
Matud pa ni MCPO Deputy Director for Operations Supt. James Gofort nga puntarya sa maong operasyon si Ebrahim apan diha usab ang upat ka mga suspetsado hinungdan nga gihiling usab sila ug nakuhaan usab og mga ebidensiya.
Si Gofort miingon nga ang police decoy mipalit og tulo ka gagmay nga pakete sa shabu apan human sa transaksyon nakamatikod si Ibrahim nga awtoridad ang mipalit kaniya ug midagan balik sa ilang panimalay.
Apan gisundan kini sa kapolisan ug diha sulod sa balay nasakpan ang laing upat ka dinakpan ug ang cocaine brick atol sa pagsiksik.
Nakuha usab ang 500 pesos nga buybust money ug ang gituhuang halin sa pagpamaligya og ilegal nga drugas balor P8 mil.
Ang mga suspek dihang gikuhaan og habig sa mga sakop sa media kusganong mihimakak nga namaligya sila og ilegal nga drugas. (/EIM) (BANATNEWS)