CEBU, Philippines - Talandugon ang kahimtang sa usa ka mag-uuma human kini nakaangkon og upat ka samad pinusilan sa iyang kalawasan dihang gipusil sa iyang kontra samtang kini nangguna sa iyang umahan sa sitio Awihaw barangay Sta. Rosa siyudad sa Danao kagahapon sa alas 9:30 sa buntag.
Ang biktima mao si Vicente Hermosa, 54, molupyo ra usab sa maong lugar samtang ang kapulisan duna nay natumbok nga responsable sa krimen apan padayon pang nangita og lig-ong ebidensiya ug nagpahigayon pa usab sa ilang manhunt operation sa paghimo ning balita.
Subay sa giduso nga spot report sa Danao City Police sa Cebu Police Provincial Office (CPPO) ang biktima samtang nangguna kini sa mga sagbot sa iyang tanom kalit lang miabot ang suspek ug gipusil makadaghang higayun gamit ang wala pa matinong kalibre sa armas.
Ang biktima naigo sa iyang dughan, tuong bukton, tuong kamot ug tuhod ug gibiyaan sa suspek nga misibat pahilayo.
Ang mga silingan na mihatod sa biktima sa Danao City District Hospital apan gi-transfer dayun sa tambalanan dinhi sa Sugbo tungod sa delikadong kahimtang.
Away sa yuta tali sa biktima ug suspek ang gituohang motibo sa krimen nga padayun pa usab karung gisubay sa kapulisan. - BANAT NEWS