CEBU, Philippines - Giingong bata-bata sa sinagop ni Mayor Socrates Fernandez nga si Joavan Fernandez ang nagtingkagol sa Talisay City detention cell human makuhai diha sa checkpoint og usa ka kutsilyo samtang luwan sa usa ka sakyanan niadtong Martes sa gabii diha sa sitio Mananga, barangay Tabunok, dakbayan sa Talisay.
Ang suspetsado mao si Mc Mewel Sabejon, 27, taga barangay Lawaan I, Talisay.
Si Insp. Hugo Rio Ipong sa Talisay City Police Station nga nahinabi sa Banat News kagahapon mibutyag nga nagpahigayon sila og checkpoint diha sa Mananga.
Nabantayan nila si Sabejon nga naggunit og kutsilyo ug misuway unta kini sa pagdagan apan dali kining nagunitan nila ni PO2 Jason Del Campo, PO1 Dennis Onasin ug PO1 Mario Cartuciano.
Kahinumduman nga si Sabejon gipasakaan og kaso sa kapolisan kaniadto tungod sa pagtuok niya kang PO2 Stephen Sefuesca dihang gisita siya niini tungod kay nagmaneho siya sa motorsiklo nga walay plaka ug wala usab siya’y lisensiya diha sa may gate sa Vista Grande Subdivision sa barangay Bulacao, Talisay diin magpuyo si Joavan. - BANAT NEWS