CEBU, Philippines - Duha ka notadong drug pusher nasikop sa mga ahente sa Philippine Drug Enforcement Agency (PDEA) Central Visayas atol sa gilusad nga buy-bust operation didto sa sitio Lakaron, barangay Pitalo, lungsod sa San Fernando sa miaging gabii.
Ang nadakpan mao sila si Gyndell Cabigon ug Geronimo Canicon Jr. pulos hingkod nga taga San Fernando.
Usa ka paketeng gituohang shabu nasakmit gikan kang Cabigon, samtang lima usab sa susamang pakete ang nasakmit gikan kang Canicon.
Migamit ang taga PDEA og poseur nga nagdala og P500 nga marked money nga nagsilbing bayad sa shabu nga baligya sa mga suspetsado.
Si Jessie Tabanao tigpamaba sa PDEA nga nahinabi sa Banat News sa telepono kagahapon sa hapon nagkanayon nga notado nang namaligya og shabu sa maong lugar sila si Cabigon ug Canicon.
Matud ni Tabanao nga nakadawat sila og reklamo gikan sa mga residente sa maong dapit hinungdan nga gipahigayon dayon nila ang buy-bust.
Ang duha nagpahayahay na karon sa detention cell sa PDEA ug karong buntag gitakda nang pasakaan sila og kaso. (BANAT NEWS)