CEBU, Philippines - Uyon si Mayor Michael Rama sa laraw ni KongresistaTomas Osmeña sa habagatang distrito sa dakbayan sa Sugbo nga himoong sakop sa Siyudad sa Sugbo ang Munisipyo sa Cordova.
Sumala ni Rama nga malinawon ang Cordova ug duol lang kaayo ang distansiya niini sa siyudad.
Hinuon matud pa sa mayor nga gikinahanglan gihapon nga konsultahon ang mga residente sa Cordova bahin sa maong laraw.
Amenado ang mayor nga moagi gyud og taas nga proseso ang nahisgutang laraw busa bukas siya sa “legislative intervention” kung gikinahanglan ang presensiya sa mga opisyales sa siyudad.
Kahinumdoman nga wala mauyoni sa kampo ni Gobernadora Gwendolyn Garcia ang suhestiyon ni Osmeña ug gihulagway kini nga tataw lang nga gibuak niini ang probinsya sa Sugbo.
Sumala pa sa gobernador nga aduna na’y nakalinya nga mga proyekto gikan sa kagamhanan sa probinsya alang sa Cordova busa dili na kinahanglan nga kuhaon sa siyudad sa Sugbo ang maong dapit.
Samtang giklaro ni Mayor Rama nga dili siya mohatag og komento sa padayong panagbangi tali nila ni Osmeña ug Garcia.
Nagkanayon ang mayor nga unahon niya ang iyang mga trabaho aron dili maapektohan ang mga nagpadayong proyekto ngadto sa iyang mga konstituwente. - BANAT NEWS