CEBU, Philippines - Ang dakong katuyoan sa pag-usab sa Mt Manunggal ngadto sa Mt. Magsaysay mao ang pag-ugmad sa maong bungtod ngadto sa pagpatahom niini nga suroyanan sa mga turista.
Mao kini gipasabot ni Engr. Greg Senining, National Media Officer sa ANAD Partylist kinsa nagkanayon nga wala masayop si Representante Pastor Alcover Jr, sa ANAD Partylist sa paghimong Mt. Magsaysay sa Mt. Manunggal aron paghatag og pasidungog kang kanhi Presidente Ramon Magsaysay kinsa namatay sa maong bungtod dihang nahagsa ang abyon nga gisakyan niini sa maong lugar.
Miingon si Senining nga ang rason ni Alcover sa paghimong Mt. Magsaysay sa maong bungtod, mao nga aron dali kining ilhon sa mga turista sa tibuok kalibotan tungod sa kadungganan sa ngalang Magsaysay sa kasaysayan sa Pilipinas.
Ikaduhang rason niini mao nga aron mahawan ang maong lugar ug wala nay manimuyo nga mga rebelding komunista ug mawala na usab ang plantasyon sa marijuana.
Sa pagmahay ni Kongresista Pablo John Garcia nga wala siya konsultaha ni Alcover ning maong plano, si Senining miingon nga dili mahigawad ang halangdong Kongresista sa ikatulong distrito sa lalawigan sa Sugbo tungod kay dili kalikayan ang public hearing o konsultasyon sa katawhan bahin ning maong balaodnon sa higayong sugdan na kini pagtuki sa ubos balay balaoranan.
Midugang si Senining nga dili usab mabasol si Garcia kun wala siya kahunahuna sa pag-usab sa Mt Manunggal ngadto sa pagka-Mt. Magsaysay kay bisi kini sa iyang gimbuhaton sa ubang mga lungsod sa iyang distrito.
Samtang si Alcover kinsa gihulagway ni Senining nga sama og pangandoy ni Magsaysay nga hawanan ang nasud sa mga rebelding komunista, nagtan-aw sa kadungganan ni Magsaysay nga angayang pahinungdan sa mga Sugboanon og dakong pagtagad. Matud pa ni Senining nga angayang magpasalamat ang mga Sugboanon nga nahimong representante si Alcover kinsa mao ray bugtong magbabalaod sa nasud nga nakaako sa paglutos sa mga komunistang representante karon sa kongreso nga walay kukahadlok bisan gamay.
Matud pa ni Senining nga dili makuwestiyon ang kaisog nga gipakita ni Alcover pagpanalipod sa nasud gikan sa mga komunistang rebelde pinaagi sa paglatigo niini kanunay sa iyang mga kaubanang mga komunista didto sa kongreso ug gani ang iyang kaisog nga walay sama pagpakigbatok sa mga rebelde angayang suportahan sa katawhan sa tibuok nasud, aron sa makausa pa hingpit nga mahanaw ang mga rebelde sa Pilipinas, matud pa ni Senining. - (BANAT NEWS)