CEBU, Philippines - Ang kagamhanan sa dakbayan sa Sugbo andam mohinabang og salapi sa pamilya sa usa ka ginang nga namatay human kini maligsi ug naguyod sa sakyanan niadtong Sabado didto sa Governor Cuenco Avenue sa barangay Banilad, ning dakbayan sa Sugbo.
Mao kini ang gibutyag ni Mayor Michael Rama kinsa miingon nga dili pa matino kung pila ang kantidad sa maong hinabang sanglit kinahanglang hikayon pa kini sa mga tagtungod ug kabanay sa biktima sa buhatan sa Department of Social Welfare and Services (DSWS).
Miduyog si Rama sa gibating kasubo ug pagbangutan sa mga tagtungod ni Anecita Arong, 54, minyo, ilabi na nga usa lang siya ka inosenteng tiglimpyo sa karsada.
Si Arong, naligsan sa usa ka pribadong sakyanan sa Governor Cuenco Avenue, unya naguyod kini kay wala mohunong ang sakyanang nakaligis kaniya.
Patay nang nadiskobrehan ang biktima didto sa kinapusorang bahin sa dakbayan sa Mandaue nga may gilay-ong usa ka kilometro gikan sa lugar diin siya hiligsi.
Samtang naangol usab ang iyang banang si Jose Arong, 58, human kini malagpot sa gisakyan nilang motorsiklo.
Ang magtiayong Arong nagsakay sa ilang motorsiklo dihang gidumbol kini usa ka Kia Sorento nga wagon type nga nagtangag sa plakang ZFJ-766 ug gimaneho ni Vicente Lim.
Natagak sa karsada si Anecita ug nadagit sa sakyanan ni Lim , samtang si Jose milupad ug naugsok kini sa batuong bahin sa daplin sa karsada.
Ang drayber kinsa miangkong wala siya kamatikod nga may nadumbolan siyang motor ug nakaligis sa biktima nagpahayahay na karon sa prisohan samtang mag-atubang sa kaso nga isang-at batok kaniya. - (BANAT NEWS)