CEBU, Philippines - Nagtingkagol sa Talisay City detention cell ang 40-anyos nga lalaki human kini maimbargohi sa mga polis og shotgun kagahapon sa mga alas 6:30 sa buntag diha sa sitio Iba, barangay Lagtang, dakbayan sa Talisay.
Ang suspetsado mao si Antonio Alpar, residente sa nahisgutang lugar ang mag-atubang og kasong illegal possession of firearms human ireklamo sa usa sa mga residente ngadto sa mga polis diha sa ilang lugar kabahin sa usa ka armadong tawo.
Si PO2 Leandro Azarcon uban nila ni PO1 Rosauro Pasumala ug PO1 Jason Del Campo kinsa daling miresponde sa maong report misikop sa suspek nga yano rang nagbitbit sa ‘pugakhang.’
Si Azarcon nga nahinabi sa Banat News kagahapon nagkanayon nga nasugatan nila si Alpar nga naglakaw sa karsada nga nagdala sa usa ka improvised shotgun nga dunay usa ka buhing bala hinungdan nga ilaha dayon kining gisikop.
Si SPO2 Jerome Abatayo, jailer sa detention cell mibutyag sa Banat News nga si Alpar misulti ngadto kaniya nga gi-hire siyang pabantayon sa usa ka balay nga nahimutang diha sa sitio Iba ug ang shotgun iyaha rang hinimo. (BANAT NEWS)