CEBU, Philippines - Nagtingkagol karun sa karsel ang usa ka gipasanginlang ‘bugaw’ human kini pasanginling mibaligya sa mga menor de edad nga silingang babaye diha sa lungsod sa Alcoy. Ang nasikop mao si Lian “Ate Lian” Magsalang Masangkay, 47, molupyo sa Ingles-V. Rama ning dakbayan tungod sa kasong Qualified Trafficking in Persons.
Nasayran nga ang suspetsado nasikop tungod sa tulo ka mga batang reklamante tungod sa pagsuway unta niini pagbaligya kanila sa usa ka langyaw dihang nag-edad pa sila og 17-anyos, 14-anyos ug 18-anyos.
Base sa gibuhiang pamahayag sa tulo ka biktima, nga niadtong tuig 2006 giingong gidala sila sa suspetsado sa syudad sa Sugbo ug gidala sa usa ka kan-anan.
Samtang nagkaon adunay ka-estorya sa telepono ang suspek ug dali silang giingnang mangadto sila sa usa ka hotel aron ipaila-ila sa usa ka langyaw, tungod sa ilang dakong pagsalig mikuyog ra usab sila niini.
Pag-abot nila sa maong hotel gipasulod sila sa usa ka kwarto ug giingong migawas dayon ang suspek ug mipahimangno kanilang sundon kung unsay gusto sa langyaw.
Sa diha nga biyaan na sila sa suspetsado giingong ang langyaw mihinay-hinay na og hikap sa ilang abaga ug daw aduna kini buhaton nga dili maayo kanila nag-iyahay sila og pangita’g pamaagi aron makagawas sa lawak. (BANATNEWS)