CEBU, Philippines - Naguyod og gibana-banang usa ka kilometro ang usa ka ginang nga street cleaner ilawom sa usa ka sports utility vehicle nga miresulta sa pagkahabwa sa iyang ginhawaan ug namatay pasado alas-3 sa kaadlawon kagahapon diha sa Governor Cuenco Avenue sa barangay Banilad ning dakbayan.
Ang namatay nailhan nga si Anecita Arong, 54, kansang kalawasan daw giagian og galingan tungod sa naangkong kadaot samtang naangol usab ang iyang banang si Jose Arong, 58, tungod sa kadaot sa iyang lawas human siya malagpot gikan sa ilang gisakyang motor.
Matud pa ni PO2 Edgardo Becoy, traffic investigator sa Cebu City Police Office, ang mga biktima nagsakay og motorsiklo nga patubang sa nahisgutang lugar aron unta susihon ang lugar nga silhiganan ni Anecita.
Apan samtang naghinay-hinay sila og padagan kalit lang sila nga gidumbol sa usa ka Kia Sorento nga wagon type nga adunay plakang ZFJ-766 nga gimaneho ni Vicente Lim.
Tungod niini, maayong pagkalagpot sa duruha apan wala damha nga si Anecita didto napasok sa ilawom nga bahin sa sakyanan ni Lim hinungdan nga maayong pagkaguyod niini.
Matud pa ni Becoy nga ang lawas sa biktima nakabuhi nalang sa maong sakyanan diha na sa Kabangkalan sa syudad sa Mandaue nga gibana-banang may gilay-on nga usa ka kilometro gikan sa nahitaboan.
Midugang si Becoy nga si Lim nangangkong wala gyud kini makamatikod nga aduna siyay nadasmagan ug kung adunay tawo ilawom sa iyang sakyanan samtang siya nagmaneho pauli.
Sumala pang Becoy ang sakyanan nakaabot pa gyud sa ilang panimalay sa Holy Family sa Maguikay syudad sa Mandaue nga daw wala ray nahitabo base sa pangangkon sa suspek.
Butyag usab ni Becoy nga pipila ka mga concerned citizen nga nakakita sa pagkahulbot sa lawas sa biktima ang daling misunod ni Lim hangtod nga natultulan ang panimalay niini ug daling gisumbong sa Kasuntingan Police Station.
Tungod niini, si Becoy ug kaubanan miadto sa panimalay ni Lim ug mipahibalo kalabot sa maong insidente ug giaresto kini. Matud pang Becoy mubo ra kaayo ang clearance sa ilawom sa maong sakyanan maong posibleng kini ang hinungdan nga lisod makit-an kun aduna bay napasok sa ilalom niini.
Kasong reckless imprudence resulting in homicide, physical injury and damage to property maoy atubangon sa suspetsado. (EIM) (BANATNEWS)