CEBU, Philippines - Onse ka firetrucks sa Cebu City Bureau of Fire Protection ang nagtabang pagpakgang sa sunog nga miigo kagahapon sa buntag sa duha ka andana nga panimalay diha sa No. 19 Mabini St., sa barangay San Roque ning siyudad.
Si SFO1 Nilo Daculan, imbestigador sa Cebu City Fire Department nagkanayon nga nadawat nila ang alarma sa sunog alas 10:24 ug ilang nakontrolar sulod lang sa napulo ka minutos nga gipaubos sa second alarm.
Sa pasiunang imbestigasyon ni Daculan nasuta nga nagagikan ang sunog sa balay nga ginama sa light materials nga gipanag-iya sa pamilyang Milagros Benlot ug daling mikatap ngadto sa tupad nga balay nila ni Honoracio Parawan ug Jovy Manheron ug ang boarding house nga gipanag-iya ni Annabella Macaantal. Hinuon slightly damage lang ang kadaut sa balay nilang Parawan, Manheron ug boarding house ni Macaantal.
Gikataho nga ang pamilyang Benlot wala diha sa ilang balay atol sa sunog apan ang iyang bayaw nga babaye nga si Mardelita Obenita lamang ang nahabilin diha sa ubos nga bahin sa duha ka andanang balay
Si Obenita giingong mitug-an sa kabomberohan nga electrical misuse ang hinungdan sa kayo apan susihon pa sa kampo ni Daculan kung tinuod ba gyud nga kuryente ang hinungdan sa maong sunog.
Gibana-bana ni Daculan nga mokabat lang og P75 mil ang kinatibuk-ang danyos sa maong sunog.
Si Daculan nga nahinabi sa Banat News sa telepono kagahapon sa hapon mitug-an nga sugod niadtong Marso uno hangtud kagahapon miabot na’g pito ang gitubag nilang alarma sa sunog dinhi sa dakbayan. - BANAT NEWS