CEBU, Philippines - Patay ang usa ka mag-uuma nga ex-convict human pusila sa iyang kontra nga tanod kinsa usa usab ka ex convict atol sa ilang panag-abot sa usa ka tindahan didto sa bukirang bahin sa barangay Caliriohan, lungsod sa Dalaguete sa miaging gabii.
Ang biktima mao si Domingo Gamboa Gutierrez, 27, ulitawo, usa ka mag-uuma ug ex-convict nga nagpuyo sa maong lugar, samtang ang suspek mao usab si Renerio Alidelias Tobis, 50, minyo ug tanod sa barangay Katolohan, kinsa usa usab ka ex- convict.
Si PO1 Arnel Calisang, desk officer sa Dalaguete Police mibutyag sa Banat News nga ang mga biktima sumala sa duha ka mga saksi nga sila si Juliano Carungay ug Teresito Caruana, pulos hingkod, nga nagka-abot kini sa tindahan sa maong lugar.
Ang biktima maoy unang naabot unya miabot usab ang suspetsado ug sa walay daghang estorya mibunot sa iyang armas ug dayon gipusil sa ulo ang biktima samtang nakatalikod.
Nahagba atubangan sa tindahan ang biktima ug namatay diha-diha kansang bala milapos sa agtang gikan sa tingkoy, samtang dali kaayong nakasibat ang suspetsado.
Hinuon sa gilusad nga hot pursuit operation sa kapolisan nadakpan dayon ang suspetsado didto sa balay niini pinaagi sa abag sa kapitan sa barangay nga si Terencio Zamora. - BANAT NEWS