CEBU, Philippines - Dili mahinayon ang pagbalhin og bilanggoan ni SPO1 Adonis Dumpit gikan sa Cebu City Jail ngadto sa Talisay City Jail human gibasura sa korte ang gidusong mosyon sa iyang abogado kagahapon sa buntag.
Ang kampo ni Dumpit misang-at og urgent motion ngadto sa sala ni Regional Trial Court (RTC) Ester Veloso sa Branch 6 pagpabalhin sa maong polis sa TCJ tungod sa kapeligro sa seguridad niini diha sa CCJ.
Diha sa CCJ nabutang ang kadaghanan sa mga dinakpan ni Dumpit ug giisip kini nga ‘high risk’ prisoner ni Jail Warden Felixberto Jagorin.
Si Judge Veloso wala mohatag og gibug-aton sa giingong kabalakang peligro ang kinabuhi sa maong polis diha sa CCJ sanglit ang suwat nga giingong gipadala sa ‘mayor de mayores’ sa mga piniriso pulos lang ‘hearsay’ kon tabi-tabi lang.
“Based on his letter, it would appear that this information came from the jail’s mayor de mayores who is unnamed. When queried as to whom these people were, the jail warden did not know,” matud pa sa kamandoan sa korte.
“It is at once apparent to the court that the Cebu City Jail Warden’s statements are based on hearsay and not of his personal knowledge,” matud pa ni Veloso.
Gikwestyon hinuon ni Veloso ang kapabilidad ni Jagorin sa trabaho niini nganong dili niya masigurong maprotektahan si Dumpit diha sa CCJ.
Si Talisay City Warden Renante Rubio una nang mipadayag sa korte nga luwas si Dumpit sa ilang pasilidad apan dili kini makasigurong adunay maka-escort niini paghatud-hatud sa hukmanan panahon sa hearing tungod kay kuwang ang iyang mga tawo.
Si Rubio dihang nahinabi sa Banat News mibutyag nga andam siyang modawat kang Dumpit sa TCJ sanglit walay peligro sa kinabuhi niini diha sa mga nabilanggo. - BANAT NEWS